Azərbaycan dili və nitq mədəniyyəti (Naibə Məmmədli) Yaz 2021/2022
“Azərbaycan dili və nitq mədəniyyəti” fənninin tədris məqsədi tələbələrdə öz fikirlərini həm yazılı, həm də şifahi formada düzgün, aydın, məntiqi, yığcam, səlis, zəngin, canlı, sadə, anlaşıqlı bir şəkildə ifadə edə bilmək bacarıq və vərdişləri yaratmaqdır. Tədris olunan hər bir mövzuda müasir Azərbaycan ədəbi dilinin həm şifahi, həm də yazılı formaları üçün qəbul edilmiş normalar aydınlaşdırılır, dili və nitqi formalaşdıran vahidlərin içərisində danışıq səslərinin yeri müəyyələşdirilir, onların əsas xüsusiyyətləri təsvir edilir, ünsiyyət prosesində onların rolu dəqiqləşdirilir və beləliklə də, onlardan dildə istifadə etmək qaydaları formalaşdırılır. Tədrisi prosesində mədəni nitqə yiyələnməyin daha effektli, səmərəli üsul və vasitələri şərh olunmalı, onlardan düzgün istifadə yolları göstərilməlidir.
Beləliklə, bu tədris fənninin məqsədi tələbələrə müasir Azərbaycan ədəbi dilinin fonetik sistemi, lüğət tərkibi və qrammatik quruluşu, orfoepiya və orfoqrafiyası, dilin normaları və üslubları haqqında müəyyən elmi-nəzəri biliklə yanaşı əməli işə yardımçı olacaq praktik fəaliyyət vərdişləri də aşılayır. Dilimizin yazılı və şifahi normalarına yiyələnmək nitq mədəniyyəti üçün əsas şərt sayılır. Qloballaşma şəraitində Azərbaycan dilinin qorunması, təbliği və inkişafını təmin etmək üçün tələbələrdə düzgün nitq formalaşdırma qabiliyyəti, aydın fikir ifadə etmək bacarığı, dilin zənginliklərindən, söz ehtiyatından səmərəli istifadə qaydalarının öyrədilməsidir.
